بـــــــلادي انــــا
بلادي أنا بلاد ناسا مواريثهم في أول شئ
كتاب الله وخيل مشدود وسيف مسنون حداهو درع
وتقايبا تسرج الليل مع الحيران وشيخا في الخلاوي ورع
وكم نخلات تهبهب فوق جروف الساقية وبقرة حلوبة تتضرع وليها ضرع
وساقية تصحي الزول مع الفجراوي يبكي الليل ويدلق في جداولو دمع
يخدر في بلادي سلام
خدرة شاربي موية النيل تزغرد في البوادي زرع
بلادي أنا بتكرم الضيف
وحــتي الطير يجيها جـعان مــن أطــــــــراف تقيها شـــبع
بلادي أنا بتشيل الناس كل الناس وساع بي خيرو لينا يسع
وتتدفق مياه النيل علي الوديان
بياض الفضة في وهج الهجير بيشع
بلادي الصفقة والطنبور ودارات تنح في الليل
وبنوتا تحاكي الخيل يشابن زي جني الريل
وشبالن مكنتل في طريفو ودع
بلادي سهول بلادي حقول
بلادي الجنة للشافوها أو للبرة بيها سمع
بلادي أمان بلادي حنان و ناسها حنان
يكفكفو دمعة المفجوع
يبدوا الغير علئ زاتهم يقسمو اللقمة بيناتهم
ويدوا الزاد حتي ان كان مصيرهم جوع
بحبو الدار يموتوا عشان حقوق الجار
يخوضوا النار عشان فد دمعة
كيف الحال كان شافوها سايلي دموع
****
ديل أهلي البقيف في الدآرة وسط الدآرة واتنبر
وأقول للدنيا ديل أهلي
عرب ممزوجة بي دم الزنوج الحارة ديل أهلي
ديل قبيلتي لما أدور أفصل للبدور فصلي
أسياد روحي والاحساس وسافر في بحار شوقهم زمان عقلي
اقول بعضي
الاقيهم تشربوا في مسارب الروح بقوا كلي
محل قبلت القاهم معاي معاي زي ضلي
لو ماجيت من زي ديل وآ أسفاي وآ مأساتي وآ ذلي
تصور كيف يكون الحال لو ما كنت سوداني وأهل الحارة ما أهلي
ســـــــــــــــــــــــــــــــــــــــــــــــــــــــوداني